رواية للشوق نار الفصل السادس6 بقلم تقي محمد

طلعنا من المدرسه اجرنا بيت والاجار كان غالي بس مافي طريقه غير كدا امي تعبت وندى جاتا حمة الضنك 

وحياتنا بقت ماشه من صعوبه لي صعوبه بقيت افتش لي شغل القروش الكانت معانا مفترض تقعدنا فتره لكن مع قروش المستشفى والعلاجات لي ندى خلصوا 

فتحت لي كوفير في البيت حقنا وعملت لي اعلانات ليهو في الفيس في قروب الشماليه بس مافي زول جاء او طلب حاجه مرة جيرانا جاتني وقالت لي دايره اعمل ليها تاتو واكوي ليها شعرها وارسم ليها اتفقت معاي على مبلغ حلو المهم اشتغلت ليها ورسمت ليها رسمه حلوه قلت ليها اعملي لي دعايه في الحي قالت لي اكيد يازوله طلعت مني مشيت لبست لي عبايه وقلت لي امي طالعه وجايه ركبت ركشه مشيت السوق اشتريت لي فواكه كتيره وسمك وخضار واشتريت سكر واشتريت لي كم حاجه معاهم ومشيت البيت قطعت الفواكه ورفعتهم لي جارتنا خلطتهم لي عملت لي عصير لي ندى وقطعت فواكه لي امي وعملت لي شوربة سمك لي الغداء مع ازان العصر الباب دقه فتحت الباب لقيتا بت جيرانا الامها جات اتحننت عندي اسمها وجن قالت لي يا نسمه دايراك تظبتيني طالعه مع خطيبي وعايني شكلي قلت ليها طوالي اتفضلي بديت ليها شغل جلسات عنايه ومكوة شعر وعملت ليها ميكب خفيف في الوقت دا كانت بتحكي لي عن خطيبها وكيف اتعرفوا وكيف هي بتحبو من كلامها عرفت انو بعني ليها كتير المهم عزيتها عز لمن هي بقت تتشكر فيني قالت لي واي يا نسمه مؤيد م ح يعرفني قلت ليها دا المطلوب حاسبتني وطلعت بعدها جوني كم مره قالوا لي جاينك من طرف سماح ام وجن دايرين يتحننوا حننتهم طبعا يدي خفيفه شديد خمسه دقائق انتهيت من الرسمه خلصت منهم ندى جات لقتني انتهيت قالت لي الكيس فاضل فيهو حاجه قلت ليها حبه قالت لي النبي ارسمي لي رسمت ليها قالت لي امي قالت ليك جيبي زبادي من الدكان دايره تعمل ملاح روب قلت ليها تماام طلعت مشيت جبت ليها الزبادي وجيت لقيت الحريم حنتهم نشفت طلعوها وحاسبوني ومشوا عاينت لي الصالون بعد فاتو كان عباره عن وسخ اكياس البيقن والبيقن الطلع مع الرسم شلت المقشاشه وبديت اكنس فيهو ورتبت الحاجات مكانها حمدت ربي كتير إنو الشغل بقى ماشي والحال ميسور...

امي عملت الغدا اتغدينا وقعدنا نتونس انا كنت فاتحه تلفوني واعاين لي صورنا انا واحمد يوم الخطوبه بدون اي مقدمات قعدت ابكي بكيت قدرتي ندى وامي قالوا لي مالك.. ندى شافت صورة احمد في التلفون قالت لي يا نسمه ادعي ليهو هو محتاج دعواتك اي والله فراقوا ما ساهل علينا كلنا بس قدروا كدا ربنا بعوضك بالاحسن إن شاء الله قلت ليها ياندى احمد مافي احسن منو! مافي لو فتشت الكره الارضيه كلها ما ح القى احسن منو حتى زيو ما ح القى...

حضنتني عليها وبقينا نبكي الاتنين امي قالت لي الله يصبرك يا بتي...

مرت الايام وفي يوم جاتني وجن تبكي قالت لي نسمه الحقيني...